2 და 6 ივლისს, სფფ-ის ნუცუბიძის ტექნიკურ ცენტრში საქართველოს 19-წლამდე გოგონათა ნაკრების სასელექციო მატჩები გაიმართა.  აღნიშნული მატჩები ლავრენტი დავითაშვილის გუნდისთვის ევროპის ჩემპიონატის საკვალიფიკაციო ეტაპისთვის მზადების ნაწილია.  საქართველოს 19-წლამდე გოგონათა ნაკრები ევროპის ჩემპიონატის საკვალიფიკაციო ეტაპის B ლიგის მეორე ჯგუფში იასპარეზებს. ჩვენი გუნდის მეტოქეები ირლანდიის, ბულგარეთისა და სომხეთის 19-წლამდე ნაკრებები იქნებიან. ჯგუფის მატჩები 7-13 ოქტომბერს ბულგარეთში გაიმართება.

სფფ-ის ნუცუბიძისა და გვიმბალაურის ტექნიკურ ცენტრებში, საქართველოს 15-წლამდე გოგონათა ნაკრების დასაკომპლექტებლად სასელექციო მატჩები გაიმართა. სასელექციო მატჩების შედეგების საფუძველზე, სამწვრთნელო შტაბი გიორგი გიოშვილის ხელმძღვანელობით დააკომპლექტებს გუნდს, რომელიც სერბეთში გასამართ განვითარების ტურნირში მიიღებს მონაწილეობას. საქართველოს 15-წლამდე გოგონათა ნაკრები 26-31 აგვისტოს სერბეთში სამ შეხვედრას გამართავს. ჩვენი გუნდის მეტოქეები სერბეთი, ისრაელი და უელსი იქნებიან.

შვეიცარიის ქალაქ ნიონში, უეფა-ს სათაო ოფისში 19-წლამდე ვაჟთა ასაკობრივი გუნდების წილისყრა გაიმართა. შესარჩევი ციკლის მეორე რაუნდში, საქართველოს 19-წლამდე ნაკრები B ლიგაში განაგრძობს ასპარეზობას, სადაც ზურაბ ხიზანიშვილის ნაკრები - ბოსნია-ჰერცეგოვინას, დანიას და სან მარინოს დაუპირისპირდება.  B ლიგის მეორე ჯგუფში პირველი ადგილის დაკავების შემთხვევაში, 19-წლამდე ნაკრები ელიტ რაუნდში განაგრძობს ასპარეზობას. ნოემბერში გასამართი ჯგუფის მატჩების მასპინძელი ქვეყანა მოგვიანებით გახდება ცნობილი.  ახალი ფორმატის მიხედვით, საკვალიფიკაციო ეტაპი 3-რაუნდიანი გახდა და A და B ლიგებად დაიყო. ფინალურ ეტაპზე, მესამე რაუნდში, ჯგუფის გამარჯვებული 7 გუნდი მოხვდება, რომლებსაც მერვე გუნდად, მასპინძელი ქვეყანა დაემატებათ.